Ndimubacu Louis

Nyuma y’uko  Inama  y’Igihugu Ishinzwe  Ibizamini mu Rwanda   igaragaje  urutonde  rw’abanyeshuri   bemerewe   kujya  muri kaminuza za Leta  n’amashuri makuru, ndetse no gusaba inguzanyo  muri SFAR, Oasis Gazette yifuje kumenya neza   inota fatizo  umunyeshuri  agomba kuba afite ngo abashe kubona impamyabumenyi.

Nk’uko, Rutayisire John, Umunyamabanga nshingwabikorwa w’Inama  y’Igihugu Ishinzwe  Ibizamini mu Rwanda  yabigaragaje, kugira ngo  umunyeshuri  utarabonye amahirwe yo kujya  muri kaminuza  za Leta  n’amashuri makuru  ngo abashe no gusaba inguzanyo  muri SFAR abone impamyabushobozi agomba  kuba afite nibura amanota 13/55 ku wize amasomo atari ay’imyuga na tekiniki cyangwa nibura amanota 21/55 ku bize imyuga na tekiniki.

Aha  Rutayisire John  yagize ati  “impamvu  twafatiye  ku inota ritandukanye, ni uko  abanyeshuri batiga imyuga baba biga amasomo 3 gusa, naho abiga imyuga bakiga  amasomo 6.”

Rutayisire  avuga ko    gutanga  impamyabumenyi ku banyeshuri  bazashingira  kuri ayo  manota. Ati “mu mwaka  washize  twazitangaga   duhereye  ku munyeshuri wabonye  1,5.”

Abanyeshuri  boherejwe mu mashuri makuru na za kaminuza za Leta bagera ku  6.237,  bazatangira kwiga  mu mwaka wa 2012.

Abo banyeshuri  kandi bakaba baziga  mu mashami  agera kuri 31  muri kaminuza zose za Leta n’amashuri makuru.

Naho mu mashami  yose  yakozwemo ikizamini cya Leta,  ishami rya HEG, niryo  ryafatiwe ho amanota menshi kuko bafatiye ku munyeshuri wujuje 55 kuri 55.